Áður hafa orðið slys í Bleiksárgljúfri.

Ég var að horfa á endurtekinn þátt um Sigurð Nordal í sjónvarpinu í gær. Þátturinn var byggður upp á viðtölum við Sigurð og frásögnum um hann.

Eitt af því sem Sigurður gerði var að safna þjóðsögum, hann vísaði í aðra sem höfðu safnað þeim, meðal annarra Pál Pálsson Frá Árkvörn í Fljótshlið sem hrapaði í Bleiksárgljúfri og lést aðeins 12 ára gamall. En þá hafði hann safnað allnokkrum þjóðsögum þó ungur væri.

Þetta er á heimasíðu Rangárþings eystra um gönguleiðir, þar á meðal um Bleiksárgljúfur:

"Gljúfrið er í landi Barkarstaða í Fljótshlíð. Fljótshlíðarvegurinn (261) er þá ekinn en Barkarstaðir eru um 25 km frá Hvolsvelli. Rétt er að hafa samband við landeigendur og fá leyfi. Mjög fallegt kjarri vaxið gljúfur. Hægt er að ganga upp með því bæði að austan og vestan. Vestari leiðin er líklega algengari. Þegar ofar kemur er gljúfrið þverhnípt, hyldjúpt en örmjótt. Hægt er að stökkva yfir það, en við þá iðkun hefur orðið manns skaði þegar þar hrapaði til bana Páll Pálsson frá Árkvörn 1876. Enn ofar í gilinu er það fallið saman og þar er hægt að fara yfir og niður hinu megin við það".