Stífla á útfall Jökulsár á Breiðamerkursandi.

Á RUV er frétt um það hversu mikið jökullónið á Breiðamerkursandi hefur stækkað undanfarið. Og að það stækkar mikið á hverju ári vegna þess að sjórinn á greiða leið inn í það. Hér er RUV greinin: http://ruv.is/frett/jokulsarlon-rannsakad. Ég hef sagt það áður og endurtek það sem mér finnst að eigi að gera þarna austur frá. Mitt álit er að stífla eigi fyrir rennslið í Jökulsá. Láta hana hætta að renna til sjávar um þetta rif sem hún er að renna núna. Beina eigi útfalli Jökulsár í farveg sem er rétt austan við útfall Jökulsár. Beina rennsli hennar í farveg sem áin Stemma rann eitt sinn eftir. Nú er þar engin á lengur og brúin farin. Ef Jökulsá yrði veitt í þann farveg verður hún alllangt frá sjó. Flóðs og fjöru mundi ekki gæta lengur í jökullóninu. Með því mætti koma í veg fyrir stöðuga bráðnun Breiðamerkurjökuls og í leiðinni tryggja að hringvegurinn verði fær áfram. Því ef að sjórinn grefur sig í gegnum Breiðamerkursandinn mun fjörðurinn ná langt innundir Vatnajökul. Enginn möguleiki er á því að vegurinn muni geta legið inn fyrir hann. En ef Jökulsá verður stífluð og henni beint í Stemmufarveginn verður að byggja brú þar. Það er vel viðráðanlegt verk sem kemur þá í veg fyrir að hringvegurinn rofni og að fjörður myndist inn í Breiðamerkurlón.