Vont strand og illt.

Ég tók ákvörðun fyrir nokkrum árum. Ákvörðunin er sú að skrifa ekki upp á lán. Í gamla daga var það að vera í ábyrgð fyrir víxla. Hef haldið þessu til streitu og ber því ekki ábyrgð á öðru en því sem ég er borgunarmaður fyrir. Vegna þess þá er ég ekki ábyrgur fyrir skuldum eða sukki þeirra sem eru búnir að draga land og þjóð vora í strand.

Strand þetta er skelfilegt. Í fjörunni standa menn. Líklega með línubyssuna. Engin þorir þó að skjóta línunni. Líklega stefnir þetta strandaða skipsflak í að sökkva í sandinn eins og Bresku togararnir og önnur skip gerðu sem sigldu upp í fjöru við Suðurströndina fyrr á árum. Við sendnar strendur Suðurlandsins töluðu menn um góð og vond strönd. Það byggðist á því hvað menn báru úr býtum frá strandinu.

Ég held að það strand sem nú hefur gerst sé vont strand og illt.

Ég er ekki ábekingur!