Vonandi verður opið allt árið

Spurning hvort að einhver möguleiki sé á því að tekin verði ákvörðun, sem kemur til með að opna aðgang að Dyrhólaey allt árið? Opnun umhverfisstofnunnar fyrr en reiknað var með er vonandi stefnumarkandi.

Friðun eyjarinnar og lokun hennar þjónar ekki nokkrum tilgangi. Örfá æðarpör. Eða um 20 gera sér nú hreiður á Eynni. Sílamáfur og kría eru horfin af Dyrhólaey eins og frá öðrum varpstöðvum á svæðinu.

Kríuvarpið í Víkinni sem var eitt stæsta kríuvarp á landinu er nú ekki svipur hjá sjón miðað við það sem áður var. Örfáar kríur verpa þar enn. Ungarnir þeirra drepast flestir svo flugið póla á milli skilar engu.

Eftir að Dyrhólaey var friðuð og beit sauðfjár var hætt þar hefur Eyjan verið að sökkva í sinu. Grasgefnasta svæðið í Mýrdalnum hefur sokkið í breiðu sinunnar. Togstreitan um Eyna hefur orðið til þess að þar er ekkert gert til að bæta möguleika fólks til að fara um gangandi. Hægt væri að gera gönguleiðir eins og var búið að gera tillögu um, sem mundu gera allt aðgengi um Eyna prýðisgott. Með göngustígakerfi um Dyrhóaey mundi allt villt líf geta lifað vel á svæðinu þrátt fyrir umgang mannskepnunnar. Stýring gangandi umferðar mundi sjá til þess.

Ég var lítill pjakkur þegar ég man fyrst eftir ferð á Dyrhólaey. Ég man að alla tíð bar fólkið sem ég fór með mikla virðingu fyrir Eyjunni. Maður mátti ekki velta við steini þar eða gera eitthvað sem gat skaðað Eyjuna fögru. Þessa virðingu held ég að við Mýrdælingar höfum lært af fólkinu og höfum síðan borið hana með okkur. Við höfum líka flest haft hana fyrir augum alla tíð. 

Það er mín skoðun að opna eigi Dyrhólaey fyrir fólki allt árið. Ekkert er til sem mælir gegn því.

Dyrhólaey opnuð