Palli var einn. Guðni er einn.

Saga sem ég las á minum yngri árum var um hann Palla. Hann dreymdi draum um að hann væri einn í heiminum. Þessi saga finnst mér lík þeirri stöðu sem einn Íslenskur pólítíkus er í þessa dagana.

Eftir að Bjarni Harðarson sagði af sér þingmennsku eftir óþægilegan tölvupóst er Guðni Ágústsson orðinn einn í heimi Framsóknar. Guðni er nú orðinn eini Evrópuaðildarandstæðingurinn í flokknum. Allir þingmenn flokksins eru á þeirri línu að sækja eigi um löngu tímabæra aðild  að Evrópusambandinu.

Guðni Ágústsson situr einn eftir á fjóshaug Framsóknar. Fjóshaugurinn er að síga saman svo að útsýnið af honum er lítið. Svo lítið að varla sést til næstu þúfu.

Ég held að Guðni Ágústsson sé í álíka draumaheimi og Palli. Hann vill keyra slökkvibílinn. Hann langar til að vera einum í nammibúðinni. Mest held ég að hann langi til að skjótast út í heim með geimflauginni.

En líkt og Palli mun Guðni Ágústsson vakna af draumi sínum. Og þá sjá hvernig heimurinn lítur út. Ég veit ekki hvað Guðna Ágústssyni dreymir lengi en ég er viss um að þegar hann vaknar verður heimsmyndin með allt öðrum hætti en hún var þegar Guðni Ágústsson lagðist á koddann.  Þó að hann vakni á morgun.