Opna á Dyrhólaey. Það er besta leiðin!

Það er með ólíkindum þrætumálið um Dyrhólaey. Menn keppast um að verja það sem þeir kalla sitt land. En það er ekki eignaland heldur nytjaréttur sem fólk á. Dyrhólaey hefur verið lokað síðastliðna áratugi að vori og snemmsumars. Lokað er til að verja fugl sem verpir þar. Helst hefur verið talað um æðarfugl. Mér skilst að í talningu í vor hafi fundist merki um sex æðarhreiður á Eynni.

Þetta er ekki skrýtið því að með lokun eyjarinnar hafa minkar og refir átt friðað athvarf á Dyrhólaey. Umferð fólks um Eynna hélt varginum frá fuglinum. En með lokuninni hefur ekkert haldið varginum frá æðarhreiðrunum. 

Síðan hefur komið fram ótrúleg saga um að menn séu að fara út á Dyrhólaey til þess að eyðileggja æðarhreiður. Skemma hreiðrin og fæla fuglinn frá varpsvæðinu. Þessi ásökun á fólk sem fer um Dyrhólaey er skammarleg. Skelfilegt er að vita til þess að fólk finni hjá sér þörf fyrir að saka annað fólk um að steypa undan pokafuglinum.

Ég vona að þessari lokun Dyrhólaeyjar ljúki. Eitt af því sem hefur fylgt lokuninni er að Dyrhólaey er sokkin í gras og sinu yfir vetrartímann. Því er mjög eðlilegt að Eyjan sé beitt til að sporna við ofvexti grassins. Það er líka morgunljóst að sauðfé heldur minknum og refnum frá svæðinu. 

Því held ég að það sem er best gert á Dyrhólaey sé að beita hana og leyfa ferðafólki að fara um hana eftir merktum göngustígum sem eru til á skipulagi sem var gert og samþykkt fyrir allmörgum árum.

Þinglýsa eignarhaldi á Dyrhólaey

Athugasemdir

[Einar Steinsson, 18.6.2011 kl. 17:35]

Það sem mér hefur alltaf fundist merkilegt er hve lítið hefur verið rætt í gegnum tíðina um þær miklu skemmdir sem voru unnar á lágeyjunni fyrir nokkrum áratugum þegar menn ætluðu að gera höfn þarna. Margir virðast halda að skarðið þar sé frá náttúrunnar hendi, margir leiðsögumenn sem ég fór með þarna á þeim tíma þegar ég var að keyra rútu höfðu ekki hugmynd um að skarðið væri manngert.

[Njörður Helgason, 18.6.2011 kl. 18:01]

Já það var ekki til góðs framkvæmdin við Afglapaskarð. Skarðið gert í hamravegginn niður á Kirkjufjöru. Vegur gerður frám á Lágey og miklar framkvæmdir gerðar þar. Skarðið ásamt lokun Dyrhólaeyjar eru ekki til góðs á Dyrhólaey. Dyrhólaey sem við höfum báðir haft fyrir augunum frá blautu barnsbeini