Mynd um Skaftfelling neikvæður áróður?

Það var gaman að sjá Ólaf Pétursson og Þórunni Björnsdóttur, Kristínu Friðriksdóttur og Huldu Vilhjálmsdóttur ásamt Sigrúnu frænku minni Jónsdóttur, kirkjulistakonunni heitinni í mynd sem var að hluta um skipið Skaftfelling. Mér þótti ekki rétt farið með sumt í myndinni og líka að hún var notuð í baráttu einhverra gegn því að göng verði gerð undir Reynisfjall og vegur áfram yfir mýrarnar. Gegnum eða framan við Geitafjall. Þetta þýðir að með þessum vegabótum verður láglendisvegur frá Reyðarfirði að Hveragerði. Snjóþungum köflum á leiðinni hefur þá verið útrýmt. Hvort sem það er Lónsheiði, Almannaskarð eða vegurinn innan við Vík í Mýrdal. Vegur sem oft hefur verið snjóþungur og erfiður í snjókomu. Hundslappadrífan er oft blind þar.

Ég skildi ekki hvers vegna þessi mynd um skipið Skaftfelling sem á sínum tíma var gríðarlega mikið og þarft flutningatæki til íbúa við hafnlausa strönd Mýrdalsins var notuð til þess að koma á framfæri andstöðu við gerð jarðganga undir Reynisfjall. Framkvæmd sem verður ekki síðri bót fyrir Víkina og ekki síður fyrir byggðir á austurlandi þegar hún verður gerð.