Þessi sigraði samkeppnina:

Það eru ófá skrefin sem ég geng, frá Barónsstígnum, upp Mímisgötuna og yfir Eiríksgötuna á gangstétt með slitinni sebrabraut. Ég held áfram. Mikið er kirkjan hans Guðjóns stór. Hún sem byggð var í minningu Hallgríms Péturssonar sálmaskálds. Ég geng framhjá húsinu hans guðs og á þá ekki langa leið eftir. Gangstéttin heldur mér frá bílunum. Nema núna. Ég þarf að fara fram hjá einum þeirra illa lögðum út á götuna. Nú er vor snjórinn þungur á götunni. En leiðin styttist. Ég fer upp göngubrúnna inn um rennihurðina, að lyftunni. Bíð, en fer svo með henni upp, upp. Nú er ég kominn á efstu hæðina. Þá er ég kominn á leiðarenda. Bókasafnið með öllum sínum vísdómi og afþreyingu tekur á móti mér. Ef maður steytir á steini í leit sinni er maður fljótt dreginn aftur á flot.