Það eru erfiðir tímar, en sólin skín.

Góðan daginn og til hamingju. 1. maí er alþjóða baráttudagur verkafólks. Verkafólk? Það er vinnandi fólk um allann heim. Fólkið sem heldur uppi samfélögunum með vinnu sinni og þátttöku í samfélaginu.

Það hefur margt dunið yfir okkur Íslendinga á síðasta og síðustu árum. Við sjáum það hverfa fyrir augum okkar  sem við héldum og okkur var sagt að væri okkar trygga framtíð. Ekki bara að hlutirnir hverfi heldur er reikningurinn sendur okkur fólkinu í landinu sem ekkert gerði í útrás og ofþennslu kerfisins á Íslandi.

Það eru stór höggin sem dynja á íbúum þessa lands eftir sukk liðinna ára. Við verðum að taka á okkur taumlausar hækkanir á lánunum okkar. Verðtrygging þeirra sér til þess að allar hækkanir vegna einhvers sem við fólkið í landinu skópum ekki hvolfast yfir okkur. Fólkið í landinu sem tók lánin hvort sem það var hátt hlutfall íbúðalána eða það sem í dag eru orðin himinhá bílalán situr í súpu skulda og með því óréttlæti sem kippir undan þeim sem tóku þessi lán lífsbjörginni og afkomunni.

Annað sem fylgir þessum hörmungum sem yfir okkur dynja þessi árin er atvinnuleysi. Atvinnuleysi er það sem við Íslendingar höfum ekki þurft að upplifa í nokkra áratugi. Fyrirtækin sem við héldum að væru traust eru horfin og með þeim fullt af störfum fólksins í landinu.

Erfitt er að horfast í augu við það sem er að dynja yfir okkur Íslendinga þessi misserin. En við og þjóðin okkar er baráttufólk sem lætur ekki leggja sig niður í því ástandi sem nú er. Sem betur fer eru margar leiðir fyrir fólk að leita í þegar ástandið verður slæmt. Sí og endurmenntun hefur verið talað um í mörg ár. Nú er tækifærið sem fólk getur notað sér komið. Endilega leita eftir þeim leiðum sem til eru til þess að fá styrki og aðstoð til að greiða námskostnaðinn. Aukin þekking styrkir fólk og gerir það enn hæfara til að takast á við störfin sem koma aftur inn.

Ísland verður áfram byggt fólki. Hvorki atvinnuleysi, peningakreppa eða eldgos gera okkur svo veik að við leggjum árar í bát og látum reka á reiðanum út í óvissuna.

Hér er Maístjarnan með henni Þórunni Antoníu

Gleðilegt sumar og eigið góðan dag.